TATOP AURAT

TATOP AURAT
Oleh: Hasan Basri al-Mardawy

Tatop ulee hai dara tatop ulee
Bek tatiree lagee Yahudi
Tatop singkee hai dara tatop singkee
Bek tatiree lagee Nasrani

Tatop aurat geuyue le Tuhan
Dalam Quru’an sinan na dali
Meunan syit geuyue oleh Junjungan
Meunan geupeusan oleh Nabi

Han jeut leumah takue ngon dada
Peulom uram pha ngon geutiek hanyi
Bek sagai leumah pusat u luwa
Bek leumah duwa puteng boh giri … (hai)

Nanggroe Aceh Seuramoe Mekah
Saboh daerah Nanggroe Islami
Beudoh hai rakan sambot syari’ah
Ulee bek leumah jilbab hai putri

Wahe pemuda mudi harapan
Syari’at Islam waresan Nabi
Bek le meucewek tanyoe Iseulam
Bek le pacaran lagee keubiri … (hai)

Menyoe ka meuheut jak lakee laju
Peugah bak Abu ngon Teungku Kadhi
Gata manduwa meunikah laju
Bek sampe ulu lagee keubiri

Jameun jinoe jameun ka akhe
Hana malee le dum manusia
Meunan syit ureueng le that ka bakhe
Shalat tan le jak beut pih hana

Luweue ngon bajee ka seumpet-seumpet
Kabeh meupiret boh pha ngon dada
Watee jijak meusingklet-singklet
Meupalet-palet lagee meuruwa … (hai)