P O H B E U R A K A H
DR. H. Hasan Basri, MA
Buleuen Ramadhan le that pahala
Keu ureueng puasa bandum lam donya
Meunan syit teungku nyang na di sinoe
Nyang tem pakoe ibadah puasa
Laen nibak nyan nyang na seumayang
Bandum hai rakan nyang tem taqwa
Nyang tem meudo’a uroe ngon malam
Nyang tem baca Quru’an asoe syuruga
Han ek tapike nyang laen lagee
Gadoh peh batee buleuen puasa
Gadoh ngon ek peuet, sunggoh ngon ek nam
Geupreh ngon gabnyan jitron boh duwa
‘Oh lheueh nyan teuma ijih rakan nyan
Tuwo seumayang ngon tan puasa
Watee ka seungue jipiep ngon rukok
Awak nyan ka dok ngon candu ganja
Leupah that rugoe ureueng lagee nyan
Hana pikeran hana jithee droe
‘Oh watee mate baro jiteupeue
Malaikat sueue ijih meupaloe
Nyang tem puasa ka geupeuampon
Dosa geusinthong lam laot raya
Nyang mantong tinggai ku’eh ngon bakhe
Di dalam hate aneuk manusia
Nibak uroe nyoe syeudara meutuwah
Tapeumeu’ah bandum salah geutanyoe
Tamumat jaroe beuseunggoh-seunggoh
Taduek tapiyoh tapeugah haba
Tameukhem-khem tapoh beurakah
Taduek tapeugah keu hai geutanyoe
Tabuka pikeran ngon taseumike
Pakriban lagee Nanggroe geutanyoe
Wahe pemimpin Seuramoe Makkah
Nanggroe ka meugah u donya luwa
Watee tsunami rakyat dum susah
Allah bri hikmah bantuan teuka
Nikmat Allah bri keu ureueng musibah
Bek na le susah udep lam Nanggroe
Le that raseuki nyang ka meutamah
Hana le masalah awak geutanyoe
Na sayang bacut ureung geutanyoe
Hana geupakoe ileumee agama
Tuha ngon muda meubagoe-bagoe
Ka sibok keudroe ngon urusan donya
Meunan syit teungku nyang na di sinoe
Di Tanoh rantoe di Jakaureuta
Watee mereumpok lagee lam lumpoe
Sithon sigoe bak uroe raya
Tameudo’a bak Po geutanyoe
Bek le meupaloe bandum syeudara
Tabri seumangat peukong agama
Tayue meudo’a tobat nasuha
Beudoh bandum hai rakan meutuwah
Neujak beubagah meureunoe agama
Tatanyong bak teungku peu nyang hana paih
Mangat sah ibadah keu Allah Ta’ala
Menunyoe meunan hai Teungku meutuwah
Rahmat Allah neubri sigeura
Nikmat Droeneuh nyan laju neutamah
Hana le susah ka habeh bala
Meunyoe lageenyan hai rakan meutuwah
Neupeumeu’ah lon neukjak gisa
Meunyoe na tuto lon nyang salah
Bek neukeubah di dalam dada
Le that haba nyang ka lon peugah
Mungken le salah dalam meucakra
Meunyoe droeneuh nyoe na saket hate
Meu’ah neubri bek meupeukara
@pfile.com
Email: hasbaria@yahoo.com
hasan.basrimardawy09@gmail.com
Tidak ada komentar:
Posting Komentar